الكاميرات مش بتفتح من بره؟ 5 أسباب وحلها

ده أكتر سؤال بيجيلنا من فنيي الكاميرات. الحل غالباً في واحد من الخمسة دول:

1. الـ ISP بيديك IP خاص (CGNAT)

لو العنوان اللي على الراوتر بيبدأ بـ 10. أو 100.64 أو 192.168، فإنت ورا NAT عند الشركة ومفيش Port Forward هيشتغل. الحل: اطلب IP عام من الشركة، أو استخدم خدمة P2P بتاعة الكاميرات، أو VPN.

2. نسيت قاعدة السماح في الفايروول

الـ dst-nat لوحده مش كفاية لو عندك قاعدة drop على forward. لازم accept للبورت ده قبلها.

3. البورت الداخلي غلط

الـ DVR بيشتغل على 8000 أو 37777 أو 554 حسب الشركة. افتح الكاميرات من جوه الشبكة بالبورت ده الأول وتأكد.

4. الجيتواي على الـ DVR غلط

الـ DVR لازم يكون جيتوايه عنوان الراوتر، وإلا الرد مش بيرجع.

5. بتجرب من جوه الشبكة بالعنوان العام

ده محتاج Hairpin NAT. جرّب من بيانات الموبايل مش من الواي فاي.

ونصيحة أمان: متسيبش البورت الافتراضي مفتوح على الإنترنت بكلمة سر admin. غيّر البورت الخارجي وكلمة السر، أو الأفضل خلي الوصول عن طريق VPN. الموضوع ده مغطى في كورس أساسيات الفايروول.